TANA @ New Jersey: బ్యాక్‌ప్యాక్ & స్కూల్ సప్లైస్ డొనేషన్ ప్రోగ్రామ్ విజయవంతం

ఉత్తర అమెరికా తెలుగు సంఘం (TANA – తానా) సామాజిక సేవలో భాగంగా న్యూజెర్సీ (New Jersey) లోని పెర్త్ అంబాయ్‌ (Perth Amboy) లో ఉన్న రారిటన్ YMCA – సెంటర్ ఫర్ సపోర్ట్, సక్సెస్ & ప్రాస్పెరిటీ లో “బ్యాక్‌ప్యాక్ అండ్ స్కూల్ సప్లైస్ డొనేషన్ ప్రోగ్రామ్”*ను నిర్వహించింది.

ఈ కార్యక్రమంలో భాగంగా ఆర్థికంగా అవసరమైన కుటుంబాలకు చెందిన విద్యార్థులకు 100 బ్యాక్‌ప్యాక్‌లను తానా (TANA) అందజేసింది. కొత్త విద్యా సంవత్సరం ప్రారంభమవుతున్న సందర్భంగా విద్యార్థులకు అవసరమైన సామగ్రిని అందించి వారిలో చదువుపై మరింత ఉత్సాహాన్ని కలిగించాలనే ఉద్దేశంతో ఈ కార్యక్రమాన్ని చేపట్టారు.

ప్రతి బ్యాక్‌ప్యాక్‌తో పాటు నోట్‌బుక్స్, పెన్సిల్స్, పెన్స్, మార్కర్స్, క్రేయాన్స్, రూలర్స్, ఎరేజర్స్, ఫోల్డర్స్ తదితర సుమారు 20 రకాల పాఠశాల సామగ్రిని (School Supplies) విద్యార్థులకు అందజేశారు. ఈ కార్యక్రమం ద్వారా విద్యార్థులకు అవసరమైన విద్యా సామగ్రిని అందించడంతో పాటు, పాఠశాలలు ప్రారంభమయ్యే సమయంలో అవసరమైన వస్తువుల కొనుగోలు విషయంలో ఆర్థికంగా ఇబ్బందులు ఎదుర్కొంటున్న కుటుంబాలపై భారాన్ని కొంతవరకు తగ్గించడమే లక్ష్యంగా పెట్టుకున్నారు.

ఈ కార్యక్రమంలో తానా కోశాధికారి రాజా కసుకుర్తి (Raja Kasukurthi), తానా ఫౌండేషన్ ట్రస్టీ సతీష్ మేక (Satish Meka), తానా న్యూజెర్సీ బృంద సభ్యులు, పలువురు **తానా యువ వాలంటీర్లు పాల్గొని బ్యాక్‌ప్యాక్‌లు, పాఠశాల సామగ్రిని విద్యార్థులు మరియు వారి కుటుంబాలకు అందజేశారు.

ఈ సందర్భంగా తానా కోశాధికారి రాజా కసుకుర్తి (Raja Kasukurthi) మాట్లాడుతూ, అమెరికాతో పాటు భారతదేశం (India) లోనూ అవసరంలో ఉన్న వారికి సహాయం చేయడంలో తానా (Telugu Association of North America – TANA) ఎల్లప్పుడూ ముందుంటుందని పేర్కొన్నారు.

“అమెరికాలో (USA) అయినా, భారతదేశంలో అయినా అవసరంలో ఉన్న సమాజాలకు అండగా నిలవడం తానా ప్రధాన లక్ష్యాల్లో ఒకటి. విద్యార్థులకు బ్యాక్‌ప్యాక్‌లు, అవసరమైన పాఠశాల సామగ్రి అందించడం చిన్న సహాయంగా కనిపించినా, అది వారిలో కొత్త విద్యా సంవత్సరంపై ఉత్సాహం, ఆత్మవిశ్వాసం పెంచుతుంది.

అదే సమయంలో ఆర్థికంగా ఇబ్బందులు ఎదుర్కొంటున్న కుటుంబాలపై పాఠశాల సామగ్రి (School Supplies) కొనుగోలు భారాన్ని కొంతవరకు తగ్గిస్తుంది. ఈ చిన్నారులు మరింత ఉత్సాహంతో చదువులో ముందుకు సాగేందుకు ఈ కార్యక్రమం ప్రేరణ కలిగిస్తుందని ఆశిస్తున్నాం,” అని రాజా కసుకుర్తి తెలిపారు.

స్థానికంగా అవసరమైన చిన్నారులు, కుటుంబాలను చేరుకునేందుకు తానా (Telugu Association of North America – TANA) కు అవకాశం కల్పించిన రారిటన్ YMCA – సెంటర్ ఫర్ సపోర్ట్, సక్సెస్ & ప్రాస్పెరిటీ ప్రతినిధులకు ఆయన ప్రత్యేక కృతజ్ఞతలు తెలిపారు.

ఈ కార్యక్రమాన్ని విజయవంతంగా నిర్వహించిన న్యూజెర్సీ బృందాన్ని, నిర్వాహకులను, యువ వాలంటీర్లను తానా అధ్యక్షుడు డా. నరేన్ కొడాలి (Naren Kodali), ఎగ్జిక్యూటివ్ వైస్ ప్రెసిడెంట్ శ్రీనివాస్ లావు (Srinivas Lavu), న్యూజెర్సీ రీజినల్ రిప్రజెంటేటివ్ సుధీర్ చంద్ నరేపాలెపు, తానా ఫౌండేషన్ కోశాధికారి శ్రీనివాస్ ఒరుగంటి (Srinivas Oruganti), తానా యూత్ కోఆర్డినేటర్ శ్రీనివాస్ చెరుకూరి అభినందించి కృతజ్ఞతలు తెలిపారు.

విద్య, యువత అభివృద్ధి, సామాజిక సంక్షేమానికి తోడ్పడటంతో పాటు అమెరికాలోని స్థానిక సమాజాలతో తానా (Telugu Association of North America – TANA) అనుబంధాన్ని మరింత బలోపేతం చేయడంలో ఇటువంటి సేవా కార్యక్రమాలు ఎంతో ముఖ్యమైనవని వారు పేర్కొన్నారు.

ఈ కార్యక్రమంలో చురుగ్గా పాల్గొన్న తానా యువ వాలంటీర్లను (Volunteers) నిర్వాహకులు ప్రత్యేకంగా అభినందించారు. యువతలో సేవాభావం, సామాజిక బాధ్యత, అవసరంలో ఉన్నవారికి సహాయం చేయాలనే ఆలోచన పెంపొందించేందుకు ఇటువంటి కార్యక్రమాలు దోహదపడతాయని తెలిపారు.

“Giving Back to the Community” అనే స్ఫూర్తితో తానా చేపడుతున్న సేవా కార్యక్రమాల్లో భాగంగా నిర్వహించిన ఈ బ్యాక్‌ప్యాక్ పంపిణీ కార్యక్రమం ద్వారా న్యూజెర్సీ (New Jersey) లోని అవసరమైన చిన్నారులు, కుటుంబాలకు అండగా నిలిచి, సమాజ సేవ పట్ల తన నిబద్ధతను తానా మరోసారి చాటుకుంది.