Boston, Massachusetts: TAGB దసరా దీపావళి సంబరాలలో స్పూర్తి జితేందర్ సంగీత కచేరీ ప్రత్యేక ఆకర్షణ

గ్రేటర్ బోస్టన్ తెలుగు సంఘం (TAGB) తమ వార్షిక దసరా దీపావళి వేడుకలను మసాచూసెట్ట్స్ (Boston, Massachusetts) లోని స్థానిక లిటిల్‌టన్ హైస్కూల్ పెర్ఫార్మెన్స్ ఆర్ట్స్ సెంటర్‌లో అక్టోబర్ 17న ఘనంగా నిర్వహించింది. రోజంతా జరిగిన ఉత్సవాలలో సుమారు 500 మంది తెలుగు సమాజ సభ్యులు పాల్గొన్నారు.

ఈ వేడుకలలో ప్రముఖ తెలుగు సినిమా నేపథ్యగాయని, గేయ రచయిత మరియు వాయిస్ కోచ్ ‘స్పూర్తి జితేందర్’ (Spoorthi Jithender) సంగీత కచేరీ ప్రధాన ఆకర్షణగా నిలిచింది. స్పూర్తితో పాటు అమెరికాకు చెందిన ‘లెహరి బ్యాండ్’ ప్రదర్శన ఇచ్చింది. ఈ బృందంలో డూడుల్ (ప్రధాన గిటార్), హోప్ (బేస్ గిటార్), హేమన్ (కీబోర్డ్), మరియు సైమన్ (డ్రమ్స్) ఉన్నారు. వీరు తమ అత్యంత ఉత్సాహభరితమైన, వినోదాత్మక ప్రదర్శనతో ప్రేక్షకులను అలరించారు.

అంతకుముందు, స్థానిక సాంస్కృతిక కార్యక్రమాలలో శివుని ఏడు దివ్య నృత్యాలను, వాటి వెనుక ఉన్న పౌరాణిక కథలను వర్ణించే అద్భుతమైన నృత్య రూపకం “సప్త తాండవం” (Sapta Tandavam) ప్రధాన ఆకర్షణగా నిలిచింది. ష్రూస్‌బరీలోని ‘నాట్యం స్కూల్ ఆఫ్ డాన్స్’ వ్యవస్థాపకురాలైన శ్రీమతి ఆదిలక్ష్మి గొల్లపూడి గారు నృత్య దర్శకత్వం వహించి, నిర్వహించిన ఈ రంగులమయమైన, మంత్రముగ్ధులను చేసే కార్యక్రమంలో, అన్ని వయసులకి చెందిన దాదాపు 40 మంది నృత్యకారులు, ప్రదర్శకులు –  దేవ నర్తకులు, రాక్షసులు, దేవతల పాత్రలను ధరించారు.

స్థానిక కార్యక్రమాల విభాగంలో, తెలుగు భాష, సంస్కృతి, సంప్రదాయాల వైభవాన్ని ప్రతిబింబిస్తూ, దాదాపు 150 మంది స్థానిక కళాకారులు 30కి పైగా ప్రత్యేకమైన అంశాలను ప్రదర్శించారు. సాంప్రదాయ బతుకమ్మ (Bathukamma) ఉత్సవాలను గౌరవిస్తూ నిర్వహించిన నృత్య, సంగీత వేడుక ఆ సాయంత్రం యొక్క మరో ప్రధాన ఆకర్షణగా నిలిచింది.

‘హుయ్ షీ’ నేతృత్వంలోని చైనీస్ నృత్య బృందం కూడా తమ మనోహరమైన “చైనీస్ వాటర్ డాన్స్” (Chineese Water Dance)ను తెలుగు ప్రేక్షకులతో మొదటిసారిగా పంచుకుంది. ఉత్సాహభరితమైన వేడుకలకు తోడుగా, రుచికరమైన బంతి భోజనాల విందును అందరూ ఆస్వాదించారు.

ఈ కార్యక్రమం లో భాగంగా, TAGB పిల్లల కోసం ఒక వినోదభరితమైన (Entertaining)  కథల పోటీని నిర్వహించి, బహుమతులు మరియు సర్టిఫికెట్లను ప్రదానం చేశారు. టెన్నిస్ పోటీ బహుమతులను కూడా వేదికపైనే అందజేశారు. ప్రజాదరణ పొందిన షార్ట్ ఫిల్మ్ వర్క్‌షాప్‌ను నిర్వహించినందుకు, స్థానిక తెలుగు సమాజానికి చేస్తున్న సేవలను గుర్తిస్తూ, అవార్డు గ్రహీత అయిన షార్ట్ ఫిల్మ్ దర్శకుడు సంపత్ కందాళను వేదికపై సత్కరించారు.

అనంతరం, TAGB అధ్యక్షురాలు సుధ మూల్పూర్ (Sudha Mulpur) సభను ఉద్దేశించి ప్రసంగిస్తూ, TAGB తెలుగు సమాజానికి ‘స్పూర్తి జితేందర్’ సంగీత కచేరీని అందించగలిగినందుకు తన ఆనందాన్ని వ్యక్తం చేశారు. మన సంస్కృతి, సంగీతం, నృత్యం సమసిపోకుండా భావితరాలకు నేర్పటం కోసం శ్రీమతి ఆదిలక్ష్మి గొల్లపూడి (Adilakshmi Gollapudi) లాంటి గురువులు చేస్తున్న కృషి, సేవలని కొనియాడారు.

TAGBకి ఆర్థిక సహాయం అందించడానికి ముందుకు వచ్చిన స్థానిక స్పాన్సర్‌ల (Sponsors) ఉదారత వల్ల, ఈ కార్యక్రమం విజయవంతం కావడానికి చాలా నెలల పాటు అవిశ్రాంతంగా పనిచేసిన అనేక మంది వాలంటీర్ల (Volunteers) అద్భుతమైన సామాజిక సేవ వల్లే సంస్థ ఇటువంటి వైభవోపేతమైన కార్యక్రమాలను నిర్వహించగలుగుతోందని ఆమె అన్నారు.

2026-27 TAGB కార్యనిర్వాహక కమిటీ (Executive Committee): సుధ మూల్పూర్ (అధ్యక్షురాలు), దీప్తి కోరిపల్లి (అధ్యక్షురాలుగా ఎన్నికైనవారు), జగదీష్ చిన్నం (కార్యదర్శి), సూర్య తేలప్రోలు (కోశాధికారి), మానస కృష్ణ (సాంస్కృతిక కార్యదర్శి). ధర్మకర్తల మండలి: కాళిదాస్ సురపనేని (అధ్యక్షుడు), చంద్ర వల్లూరుపల్లి (మండలి సభ్యుడు), కళ్యాణ్ కాకి (మండలి సభ్యుడు), శిరీష కేతిరెడ్డి (మండలి సభ్యురాలు), శ్రీనివాస్ గొంది (పదవిరీత్యా సభ్యుడు).