Connect with us

Events

TANA Mid-Atlantic: మహిళా సాధికారతకు పెద్ద పీట వేస్తూ మహిళా దినోత్సవ వేడుకలు

Published

on

ఎక్కడ స్త్రీలు పూజింపబడతారో, అక్కడ దేవతలు కొలువై ఉంటారు (యత్ర నార్యస్తు పూజ్యంతే రమంతే తత్ర దేవతాః), అందుకే స్త్రీ సర్వత్రా పూజ్యనీయురాలు, ఆమెకే అగ్రతాంబూలం. ఉత్తర అమెరికాలోని పెన్సిల్వేనియా రాష్ట్రం, వెస్ట్ చెస్టర్ నగరంలో శనివారం మార్చ్ 11వ తేదీన మిడ్ అట్లాంటిక్ తానా టీంవారు మహిళా సాధికారతకు పెద్దపీట వేశారు.

అవని నుంచి అంతరిక్షం వరకు అన్ని రంగాలలో పురుషులతో సరిసమానంగా రాణిస్తున్న మహిళామణులందరిలో సృజనాత్మకతను తట్టి లేపే మహిళా దినోత్సవ వేడుకలు నిర్వహించారు. 600 మందికి పైగా పెన్సిల్వేనియా మరియు న్యూ జెర్సీ పరిధిలో నివాసముంటున్న ఎందరో ప్రవాస తెలుగింటి ఆడపడుచులు ఈ వేడుకకు హాజరై ఆటపాటలతో, నృత్య ప్రదర్శనలతో, ఫ్యాషన్ షో తో ఉత్యాహంతో సందడి చేశారు.

మగువలు, చిచ్చర పిడుగులు (పిల్లలు) ప్రదర్శించిన నృత్యాలు ప్రత్యేక ఆకర్షణగా నిలిచాయి. సెలవు దినాన్ని సంబరమాశ్చర్యాలతో, ఆసాంతం ఆహ్లాద పరిచేలా వేడుక కనులవిందుగా నిర్వహించారు అని అక్కడకు విచ్చేసిన మహిళలు వారి అనుభూతిని నిర్వాహకులతో పంచుకున్నారు.

ఈ సందర్భంగా, ఇంతమంది ఆదర్శ వనితలు ఒక చోట చేరి, అటపాటలతో, కేరింతలతో హోరేటించడం తమకు ఎంతో సంతృప్తినిచ్చిందంటూ వేడుకకు విచ్చేసిన స్త్రీమూర్తులకు నిర్వాహకులు కృతజ్ఞతలు తెలియజేసారు. రస్నా బేబీ, సింహాద్రి ఫేమ్ చిత్ర కథానాయిక అంకిత ఝవేరి రాకతో వేడుక మరింత శోభాయమానంగా మారింది.

ఫిలడెల్ఫియాలో నిర్వహించిన మహిళా దినోత్సవం వేడుకలు పురస్కరించుకుని తానా అధ్యక్షులు అంజయ్య చౌదరి లావు శుభాకాంక్షలు తెలిపారు. తానా 23వ మహాసభల సమన్వయకర్త రవి పొట్లూరి మాట్లాడుతూ సమాజ నిర్మాణంలో సగభాగమైన స్త్రీ సమానత్వమే మన ప్రగతికి మూలం. విద్య, వైద్య, వ్యాపార, రాజకీయ, క్రీడ, ఆర్ధిక, అంతరిక్ష, టెక్నాలజీ వంటి పలు రంగాలలో మహిళలు ఎన్నో విజయాలు సాధిస్తున్నారు. రంగం ఏదైనా పురుషులతో సమానంగా ఉన్నత శిఖరాలు అందుకుంటున్నారు అని ప్రసంగిస్తూ “మహిళలు మీకు జోహార్లు” అని వందనం చేశారు.

తానా కమ్యూనిటీ సర్వీసెస్ కోఆర్డినేటర్ రాజా కసుకుర్తి మాట్లాడుతూ స్త్రీల జీవన ప్రమాణాలు దేశ అభ్యున్నతికి కొలమానాలు. ఒక తల్లిగా, తోబుట్టువుగా, బిడ్డగా, భార్యగా రకరకాల అవతారాలలో మగవారి జీవితానికి ఒక అర్ధం పరమార్ధం తెచ్చే మహిళామూర్తులందరికి పాదాభివందనం అని ప్రసంగించారు.

ఈ కార్యక్రమంలో తానా ఉమెన్ కోఆర్డినేటర్ శ్రీమతి ఉమా కటికి ప్రసంగం మహిళలందరిలోను స్ఫూర్తి నింపేలాగా సాగింది. తాను ఉమెన్స్ సర్వీసెస్ కోఆర్డినేటర్గా అందించిన సేవలు, గృహహింసకు లోనైనా మహిళలకు, వరకట్న వేధింపులకు గురైన మగువలకు తాను ఆసరాగా నిలిచినిన పలు సందర్భాలు నెమరేసుకున్నారు.

వైద్య రంగంలో అత్యున్నత సేవలందిస్తునందుకు గాను ప్రముఖ వైద్యురాలు డా. శైలజ ముసునూరు, డా. ప్రమీల మోటుపల్లి, డాక్టర్ ప్రశాంతి బొబ్బా, స్వర్ణ జెవెలర్స్ శ్రీమతి అలివేలు రాచమడుగు మరియు మిస్ ఇండియా డెలావేర్ శ్వేతా కొమ్మోజిని ఘనంగా సత్కరించారు.

ధీర వనితలు: మిడ్ అట్లాంటిక్ మహిళా కోఆర్డినేటర్ సరోజ పావులూరి, భవాని క్రొత్తపల్లి, లక్ష్మి ముద్దన, మనీషా మేక, రాజేశ్వరి కొడాలి, భవాని మామిడి, దీప్తి కొక, రమ్య పావులూరి, లక్ష్మి కసుకుర్తి, మైత్రి నడింపల్లి, ఇందు పొట్లూరి, రూప ముద్దన, హిమబిందు కోడూరు, స్మిత తదితరులు కార్యక్రమ విజయానికి కృషి చేశారు.

ఈ కార్యక్రమంలో తానా 23వ మహాసభల ఎగ్జిక్యూటివ్ డైరెక్టర్ రవి మందలపు, కార్యదర్శి సతీష్ తుమ్మల, మిడ్ అట్లాంటిక్ ప్రాంత ప్రతినిధి సునీల్ కోగంటి, తానా ఫౌండేషన్ ట్రస్టీ శ్రీనివాస్ ఓరుగంటి, తానా టీం స్క్వేర్ కో చైర్ కిరణ్ కొత్తపల్లి, రంజిత్ మామిడి, చలం పావులూరి, ఫణి కంతేటి, ప్రసాద్ క్రొత్తపల్లి, విశ్వనాథ్ కోగంటి, రామ ముద్దాన, రవి తేజ ముత్తు, కృష్ణ నందమూరి, కోటి బాబు యాగంటి, సాంబయ్య కోటపాటి, గోపి వాగ్వాల, సతీష్ మేక, సతీష్ చుండ్రు, వెంకట్ సింగు, మూర్తి నూతనపాటి, రమణ రాకోతు, హర్రీస్ బర్గ్ తానా టీం, తెలుగు అసోసియేషన్ ఆఫ్ గ్రేటర్ డెలావేర్ వాలీ అధ్యక్షులు ముజీబుర్ రెహ్మాన్ తదితరులు పాల్గున్నారు.

పసందైన విందు స్పాన్సర్ చేసినందుకు గాను డెక్కన్ స్పైస్ వారికీ, రుచికరమైన చిక్కని కాఫీ స్పాన్సర్ చేసినందుకు గాను భూమి కాఫీ ప్రొప్రైటర్ పాపారావు ఉండవల్లి గారికి, స్వర్ణ జువెల్స్ వారికీ, లక్ష్మి మోపర్తి గారికి, వ్యాఖ్యాతగా వ్యవహరించిన శ్రీ లక్ష్మి కులకర్ణి గారికి, మాన్విత యాగంటి, వ్యోం క్రొత్తపల్లికు, కార్యక్రమం జయప్రదం చేసిన నారీమణులకు, వాలంటీర్లకు ఫిలడెల్ఫియా తానా టీం ప్రత్యేక ధన్యవాదాలు తెలుపుకున్నారు.

Advertisement
 
 
 
 
 
 
 
 
 
 
 
 
 
 
 
 
 
 
 
 
 
 
Comments
error: NRI2NRI.COM copyright content is protected