University of Hawaii-Manoa కి అసోసియేట్ డీన్ & డైరెక్టర్‌గా డా. సురేంద్ర దారా బాధ్యతలు స్వీకరణ

హవాయి విశ్వవిద్యాలయం–మానోవాలోని ఉష్ణమండల వ్యవసాయం మరియు మానవ స్థితిస్థాపకత కళాశాల (CTAHR) నూతన నాయకత్వ అధ్యాయానికి శ్రీకారం చుట్టింది. డాక్టర్ సురేంద్ర దారా 2026 సెప్టెంబర్ 1 నుంచి అసోసియేట్ డీన్ మరియు సహకార విస్తరణ విభాగం డైరెక్టర్‌గా బాధ్యతలు స్వీకరించారు.

కీటకశాస్త్రం, సమగ్ర సస్యరక్షణ నిర్వహణ, సూక్ష్మజీవ ఆధారిత నియంత్రణ రంగాల్లో దశాబ్దాల అనుభవాన్ని డాక్టర్ దారా ఈ పదవికి తీసుకువస్తున్నారు. స్థానిక, జాతీయ, అంతర్జాతీయ వ్యవసాయ వ్యవస్థల్లో పంటల ఆరోగ్యం, జీవ ఉద్దీపకాలు, నీటిపారుదల, పోషక నిర్వహణ వంటి అంశాలపై ఆయన (Dr. Surendra Dara) విస్తృతంగా పనిచేశారు.

నాలుగు వందలకు పైగా శాస్త్రీయ వ్యాసాలు, పుస్తక అధ్యాయాలను రచించి వ్యవసాయ పరిశోధన, విద్య, విస్తరణ సేవలకు విశేషంగా తోడ్పడ్డారు. సమగ్ర సస్యరక్షణ నిర్వహణ, సూక్ష్మజీవ ఆధారిత నియంత్రణ రంగాలకు అందించిన సేవలతో అంతర్జాతీయ గుర్తింపు పొందిన ఆయన, పరిశోధన మరియు విస్తరణ సేవల్లో సాధించిన విజయాలకు అనేక పురస్కారాలను అందుకున్నారు.

ఈ పదవిని చేపట్టడానికి ముందు డాక్టర్ దారా CTAHR మావీ కౌంటీ అడ్మినిస్ట్రేటర్‌గా పనిచేస్తూ, ఆ కౌంటీకి సేవలందించే విస్తరణ కార్యక్రమాలు, వ్యవసాయ పరిశోధనా కేంద్రాలను పర్యవేక్షించారు. అంతకుముందు ఒరెగాన్ స్టేట్ యూనివర్సిటీకి (Oregon State University) చెందిన నార్త్ విలామెట్ రీసెర్చ్ అండ్ ఎక్స్‌టెన్షన్ సెంటర్ డైరెక్టర్‌గా, యూనివర్సిటీ ఆఫ్ కాలిఫోర్నియా (University of California) కోఆపరేటివ్ ఎక్స్‌టెన్షన్ లో కీటకశాస్త్ర నిపుణుడిగా సేవలందించారు.

ఈ బాధ్యతల్లో ఆయన (Dr. Surendra Dara) బహుళశాఖల పరిశోధన, విస్తరణ కార్యక్రమాలకు నాయకత్వం వహించడంతోపాటు, అధిక విలువ కలిగిన పంటల కోసం సుస్థిర పరిష్కారాలను అభివృద్ధి చేశారు. శాస్త్రవేత్తలు, వ్యవసాయ ఉత్పత్తిదారులు, పరిశ్రమ ప్రతినిధులు, స్థానిక సమాజాల మధ్య భాగస్వామ్యాలను కూడా బలోపేతం చేశారు.

తన నూతన నాయకత్వ బాధ్యతల్లో భాగంగా, హవాయిలోని (Hawaii) ఆహార ఉత్పత్తిదారులు, సమాజాలు, కుటుంబాలకు ఆచరణాత్మకమైన, ప్రభావవంతమైన శాస్త్రాధారిత విస్తరణ విద్య, పరిశోధనలను అందించే వ్యూహాలకు డాక్టర్ దారా (CTAHR – College of Tropical Agriculture and Human Resilience, University of Hawaii-Manoa) దిశానిర్దేశం చేస్తారు.

సుస్థిర వ్యవసాయ పద్ధతులు, సహజ వనరుల పరిరక్షణ, ద్వీపవాసుల ఆహార భద్రత ఆయన ప్రధాన లక్ష్యాలుగా ఉంటాయి. ప్రజా విస్తరణ, సామాజిక భాగస్వామ్య కార్యక్రమాల ద్వారా ఆక్రమణ జాతులు, మొక్కలు–నేల ఆరోగ్యం, మారుతున్న వాతావరణ పరిస్థితులకు సంబంధించిన సవాళ్లను ఎదుర్కోవడంలో విస్తరణ బృందానికి ఆయన (Dr. Surendra Dara) మార్గనిర్దేశం చేస్తారు.

శాస్త్రీయ ఆవిష్కరణలను వ్యవసాయానికి ఉపయోగపడే ఆచరణాత్మక పరిష్కారాలుగా మార్చేందుకు అంకితమైన డాక్టర్ దారా వృత్తిపరమైన అనుభవానికి కొనసాగింపుగా, ఆయన నియామకం విశ్వవిద్యాలయ CTAHR (College of Tropical Agriculture and Human Resilience, University of Hawaii-Manoa) పరిశోధనకు, హవాయి ద్వీప సమాజాలకు మధ్య అనుబంధాన్ని మరింత బలోపేతం చేస్తుంది.