Collegeville, Philadelphia: పిల్లల సందడితో కళకళలాడిన తానా మిడ్ అట్లాంటిక్ ఈస్టర్ ఎగ్ హంట్

ఉత్తర అమెరికా తెలుగుసంఘం (Telugu Association of North America – TANA) మిడ్ అట్లాంటిక్ విభాగం చిన్న పిల్లలకోసం ఈస్టర్ ఎగ్ హంట్ కార్యక్రమాన్ని ఏప్రిల్ 12వతేదీన కాలేజ్‌విల్లే (Collegeville, Philadelphia) లోని ఎవాన్స్‌బర్గ్ స్టేట్ పార్క్‌లో అత్యంత విజయవంతంగా నిర్వహించింది.

తానా బోర్డ్ డైరెక్టర్ రవి పొట్లూరి (Ravi Potluri) మద్దతుతో తానా మిడ్-అట్లాంటిక్ ప్రాంతీయ ప్రతినిధి ఫణి కంతేటి (Phani Kantheti), బెనిఫిట్ కోఆర్డినేటర్ వెంకట్ సింగు (Venkat Singu) సమన్వయంతో మిడ్ అట్లాంటిక్ తానా నాయకులు, కమ్యూనిటీ లీడర్లు, వలంటీర్ల సహకారంతో విజయవంతంగా జరిగింది.

ఈస్టర్ ఎగ్ హంట్ (Easter Egg Hunt) కార్యక్రమంలో ప్రధాన ఆకర్షణ పిల్లల ఈస్టర్ ఎగ్ హంట్. రంగురంగుల గుడ్లు మరియు ప్రత్యేక ‘గోల్డెన్ ఎగ్స’ కోసం పిల్లలు ఎంతో ఉత్సాహంగా వెతికారు. వారి నవ్వులు, కేరింతలు వేడుకల్లో అసలైన పండుగ వాతావరణాన్ని తలపింపజేసింది. ఈ కార్యక్రమానికి వచ్చిన పిల్లలందరికీ పిజ్జా వడ్డించబడింది. ఇది వేడుకలో మరింత ఉత్సాహాన్ని నింపింది.

ఈవెంట్ కోఆర్డినేటర్లు దీప్తి కోకా మరియు భవాని మామిడి అద్భుతమైన ప్రణాళికతో ఈ ఆటలను నిర్వహించి, కార్యక్రమం (Easter Egg Hunt) విజయవంతం కావడంలో కీలక పాత్ర పోషించారు. వీరు పెద్దలకు, పిల్లలకు నిర్వహించిన ఆటలు అందరినీ అలరించాయి.

మిడ్-అట్లాంటిక్ బాయ్స్ అండ్ గర్ల్స్ క్లబ్ వారు అందించిన సహకారం మరువలేనిది. ఫుడ్ స్టాల్స్ మరియు నిధుల సేకరణ కోసం ఆటలను నిర్వహించడంలో వీరి ఉత్సాహం మరియు టీమ్ వర్క్ ప్రశంసనీయమని తానా (TANA Mid-Atlantic Chapter) నాయకులు అన్నారు.

వాలంటీర్లు మరియు పాల్గొనేవారి చెక్-ఇన్, చెక్-అవుట్ ప్రక్రియను సురేష్ యలమంచి ఎంతో సులభతరం చేశారు. అలాగే ఎంసీ గా తన వ్యాఖ్యానంతో అందరినీ ఉత్తేజపరిచారు. విశ్వనాథ్ కోగంటి (Viswanath Koganti) ఈ వేడుకలోని మధుర క్షణాలను తన కెమెరాలో ఎంతో చక్కగా బంధించారు.

తానా ఈస్టర్ బన్నీ (Easter Bunny) తో పిల్లలు ఫోటోలు దిగుతూ, ఆడుకుంటూ గడిపిన సమయం కుటుంబాలకు తీపి జ్ఞాపకాలను మిగిల్చింది. కాగా ఈ కార్యక్రమంలో పాల్గొన్న వాలంటీర్లందరికీ వారి నిరంతర కృషికి గుర్తింపుగా ‘వాలంటీర్ అవర్ సర్టిఫికేట్లు’ అందజేశారు.

ఈ కార్యక్రమంలో బోర్డ్ డైరెక్టర్ రవి పొట్లూరి (Ravi Potluri) మాట్లాడుతూ, ఇలాంటి కార్యక్రమాలు కేవలం ఆనందాన్ని ఇవ్వడమే కాకుండా, సమాజంతో మన సంబంధాలను మరింత బలోపేతం చేస్తాయి. ఈ కార్యక్రమాన్ని ఇంతటి ఘనవిజయం చేసిన తానా ఫిలడెల్ఫియా (Philadelphia) టీమ్ కు వాలంటీర్లకు హృదయపూర్వక ధన్యవాదాలు తెలియజేశారు.

సేవ, సంతోషం మరియు సంఘీభావంతో మనం కలిసి ముందుకు సాగుదామని ఆయన తన ప్రసంగంలో పేర్కొన్నారు. చివరగా ఈ కార్యక్రమాన్ని విజయవంతం చేసినవారందరికీ తానా నాయకులు (TANA Leaders) ధన్యవాదాలు తెలియజేశారు.