Mrs. Asia USA గా వైజాగ్‌ వాసి సరోజా అల్లూరి, తొలి దక్షిణ భారత మహిళగా రికార్డ్: California

కాలిఫోర్నియా, లాస్ ఏంజెలెస్ లో ఉంటున్న ఆంధ్రప్రదేశ్, వైజాగ్‌ వాసి సరోజా అల్లూరి శ్రీమతి ఆసియా యుఎస్ఏ (Mrs. ASIA USA 2023) విజేతగా అత్యంత ప్రతిష్టాత్మకమైన అధికారిక మరియు పోటీ టైటిల్‌ కిరీటాన్ని పొందారు. ఈ టైటిల్‌ను గెలుచుకున్న తొలి దక్షిణ భారత తెలుగు మహిళ గా రికార్డులకెక్కారు.

ప్రధాన టైటిల్‌తో పాటు ఆమెకు ‘మిసెస్ పాపులారిటీ’ మరియు ‘పీపుల్స్ ఛాయిస్’ అవార్డులు దక్కాయి. మిస్ అండ్ మిసెస్ ఏషియా USA యొక్క అంతర్జాతీయ పోటీ గ్రాండ్ ఫినాలే నవంబర్ 19న రెడోండో పెర్ఫార్మెన్స్ ఆర్ట్స్ సెంటర్‌లో, రెడోండో బీచ్, కాలిఫోర్నియాలో విర్జెలియా ప్రొడక్షన్స్ ఇంక్ సంస్థ వారి 34వ వార్షికోత్సవం సందర్భంగా నిర్వహించబడింది.

ఫైనల్‌కు ముందు జరిగిన వివిధ రౌండ్‌లలో సరోజా అల్లూరి (Saroja Alluri) పోటీ పడింది. తన విభాగంలో గ్రాండ్ ఫినాలేలో ‘నేషనల్ కాస్ట్యూమ్ రౌండ్’ మరియు ‘ఈవెనింగ్ గౌన్ రౌండ్’ అనే రెండు పోటీ రౌండ్‌లలో అత్యధిక స్కోర్ సాధించింది.

సరోజా జపాన్, ఫిలిప్పీన్స్, చైనా, థాయ్‌లాండ్, మంగోలియా, ఇండోనేషియా మొదలైన ప్రపంచ దేశాల నుండి పాల్గొన్న మరియు ప్రాతినిధ్యం వహించిన వివిధ అంతర్జాతీయ (International) ప్రతినిధులతో పోటీ పడి గెలవడం అభినందనీయం.

సరోజా అల్లూరి భారతదేశంలోని ఆంధ్రప్రదేశ్ రాష్ట్రం, వైజాగ్‌ నగరంలో పుట్టి పెరిగారు. ఇంజనీరింగ్‌లో బ్యాచిలర్స్ డిగ్రీని మరియు న్యూయార్క్ విశ్వవిద్యాలయం నుండి మాస్టర్స్ డిగ్రీని పొందారు. ఆమె ప్రస్తుతం AT&T కంపెనీలో ఇన్ఫర్మేషన్ టెక్నాలజీ లీడర్‌గా పని చేస్తోంది.

ఇద్దరు అందమైన పిల్లల తల్లి అయిన సరోజా 7 సంవత్సరాల కొడుకు, 2 సంవత్సరాల కుమార్తె మరియు ఆమె భర్తతో కలిసి కాలిఫోర్నియాలోని లాస్ ఏంజిల్స్‌లో నివసిస్తోంది. సరోజ ఒక అభిరుచి గల నర్తకి, ఫ్యాషన్ డిజైనర్, వ్యవస్థాపకురాలు, పరోపకారి మరియు ప్రభావశీలిగా అందరికీ పరిచయం.

సరోజా అనేక లాభాపేక్ష లేని సంస్థల (Nonprofit Organizations) కోసం స్వచ్ఛందంగా నిధులను సేకరిస్తుంది. ఆమె బహుముఖ ప్రజ్ఞాశాలి. ‘ఉమెన్ ఇన్ టెక్’ లో విలువైన సభ్యురాలిగా ఆమెకు ‘అడ్మిరబుల్ అచీవర్’ అవార్డు కూడా లభించడం విశేషం.