Alaskaలో అదృశ్యమైన హరి కరసాని ఆచూకికై తానా చర్యలను తల్లితండ్రులకు వివరించిన కృష్ణ ప్రసాద్ సోంపల్లి

హ్యూస్టన్లో (Houston, Texas) నివసిస్తున్న ప్రకాశం జిల్లా (Prakasam District) అద్దంకికి చెందిన కరసాని హరి (Hari Krishna Reddy Karasani) డిసెంబర్ 22న అలాస్కా (Alaska) పర్యటనకు వెళ్ళి అదృశ్యమైన సంగతి తెలిసిందే. హరి ఆచూకికోసం ఉత్తర అమెరికా తెలుగు సంఘం (TANA) నాయకులు చేస్తున్న అన్వేషణ వివరాలను తానా ఇంటర్నేషనల్ కో ఆర్డినేటర్ కృష్ణ ప్రసాద్ సోంపల్లి హరి తల్లితండ్రులకు, బంధువులకు వివరించారు.

తానా అధ్యక్షుడు నరేన్ కొడాలి (Dr. Naren Kodali), అంతర్జాతీయ విద్యార్థుల సమన్వయకర్త డాక్టర్ ఉమా.ఆర్. కటికి (Dr. Uma Katiki Aramandla) సూచన మేరకు సంతమాగులూరులో నివసిస్తున్న హరి కుటుంబాన్ని ప్రసాద్ సోంపల్లి (Krishna Prasad Sompally) సందర్శించారు. హరి రెడ్డి తల్లిదండ్రులను మరియు అతని సన్నిహితులను కలిశారు.

తానా (TANA) ప్రతి సంవత్సరం అనేక కేసులను పరిష్కరిస్తోందని, అలాగే రెండు తెలుగు రాష్ట్రాల (Telugu States) ప్రజలకు సహాయం చేస్తుంటుందని, కానీ ఈ కేసు ప్రత్యేకమైనది కావడంతో తాము అన్ని విధాలుగా చర్యలు చేపట్టినట్లు తెలిపారు. అలాస్కా (Alaska) లో ముఖ్యంగా అక్టోబర్ నుండి ఏప్రిల్ వరకు వాతావరణ పరిస్థితులు అధ్వాన్నంగా ఉంటాయని తెలిపారు.

అమెరికాలో ఆంధ్రప్రదేశ్ (Andhra Pradesh) ప్రభుత్వ ప్రత్యేక ప్రతినిధిగా నియమితులైన శ్రీ కోమటి జయరాం (Jayaram Komati) సహాయంతో, ఎపి ప్రభుత్వం అమెరికా మరియు అలాస్కా ప్రభుత్వానికి ఈ అన్వేషణలో సహాయపడమని సిఫార్సు లేఖలను జారీ చేసిందని చెప్పారు. విదేశాల్లో నివసిస్తున్న తమవారికోసం, తల్లితండ్రులు, విద్యార్థులు తమ ప్రియమైన వ్యక్తిని ట్రాక్ చేయడంలో టెక్నాలజీని సద్వినియోగం చేసుకోవాలన్నారు.

ఆపిల్ ప్రొడక్ట్ ఎయిర్ట్యాగ్ (Apple AirTag) స్పెషాలిటీ గురించి లోతుగా వివరించారు. హరి రెడ్డి కరసాని (Hari Krishna Reddy Karasani) ఆచూకి దొరికేంతవరకు అలాస్కా (Alaska) ప్రభుత్వ కృషి ఆగదని చెప్పారు. అమెరికాలో నివసిస్తున్న తమ ప్రియమైన వారి పట్ల ఎక్కువ శ్రద్ధ వహించాలని ఆయన తల్లిదండ్రులను కోరారు. తల్లిదండ్రులందరూ తమ పిల్లలతో ప్రతిరోజూ మాట్లాడాలని అన్నారు.

అదే విధంగా అమెరికాలో వారు కూడా ఎంత బిజీగా ఉన్నప్పటికీ తమ తల్లితండ్రులతో, బంధువులతో రోజూ మాట్లాడుతూనే ఉండాలని కోరారు. తానా (TANA) చేస్తున్న సేవా కార్యక్రమాలను వివరిస్తూ, అమెరికాలో ఉన్నవారు ఏదైనా సలహా కావాల్సినవారు 1-855-687-8262, లేదా 855-OUR-TANA కు కాల్ చేయాలని కోరారు.