Rancho Cordova, California: ఘనంగా తెలుగు అసోసియేషన్ ఆఫ్ గ్రేటర్ శాక్రమెంటో సాంప్రదాయ కళల వేడుక

Rancho Cordova, California: తెలుగు అసోసియేషన్ ఆఫ్ గ్రేటర్ శాక్రమెంటో (TAGS) ఆధ్వర్యంలో సాంప్రదాయ ప్రదర్శన కళల పండుగ ‘నాట్య గాన కళా వేదిక’ నవంబర్ 16, 2025న కాలిఫోర్నియా రాజధాని శాక్రిమెంటో (Sacramento) శివారు ప్రాంతమైన రాంచో కార్డోవాలో అత్యంత వైభవంగా జరిగింది.

కార్డోవా హైస్కూల్ (Cordova High School) పెర్ఫార్మింగ్ ఆర్ట్స్ సెంటర్‌లో జరిగిన ఈ వేడుకకు 500 మందికి పైగా తెలుగు ప్రవాసులు విచ్చేశారు. ఆరు గంటల పాటు సాగిన ఈ కళా ప్రదర్శనలు ప్రేక్షకులను మంత్రముగ్ధులను చేశాయి. ఈ కార్యక్రమం వినాయక ప్రార్థనతో భక్తిశ్రద్ధలతో ప్రారంభమైంది. అనంతరం స్థానిక కళాకారులు తమ ప్రతిభను చాటుతూ ప్రదర్శించిన సాంస్కృతిక కార్యక్రమాలు ఆహుతులను అలరించాయి.

కార్యక్రమ విశేషాలు:

• శాస్త్రీయ నృత్యాలు: భరతనాట్యం మరియు కూచిపూడి నృత్య ప్రదర్శనలు.
• సంగీతం: కర్ణాటక సంగీత కచేరీలు మరియు భక్తి గీతాలు.
• ప్రదర్శనలు: 20కి పైగా సమూహ నృత్యాలు, ఏకపాత్రాభినయాలు మరియు సంగీత ప్రదర్శనలు ప్రేక్షకులలో ఉత్సాహాన్ని నింపాయి.
• సేవా కార్యక్రమం: రక్తదాన శిబిరం.

సాంస్కృతిక కార్యక్రమాలకు ముందు, టాగ్స్ (TAGS) ‘వైటలెంట్ బ్లడ్ బ్యాంక్’ (Vitalant Blood Bank) సహకారంతో రక్తదాన శిబిరాన్ని నిర్వహించింది. థియేటర్ ఆవరణలో  సిద్ధంగా ఉన్న వైటలెంట్ బ్లడ్ బ్యాంక్ బస్సులో 15 మందికి పైగా టాగ్స్ సభ్యులు రక్తదానం చేసి తమ ఉదారతను చాటుకున్నారు.

ఈ కార్యక్రమాన్ని సమన్వయం చేసిన టాగ్స్ (TAGS) యూత్ అడ్వైజరీ బోర్డ్ సభ్యుడు నమిష్ దొండపాటికి నిర్వాహకులు ప్రత్యేక అభినందనలు తెలిపారు. టాగ్స్ ప్రెసిడెంట్ శ్యామ్ యేలేటి (Shyam Yeleti) మాట్లాడుతూ.. కళాకారులకు, కొరియోగ్రాఫర్లకు, తెలుగు నేర్చుకుంటున్న విద్యార్థులకు మరియు వారికి వెన్నంటి నిలిచిన తల్లిదండ్రులకు, ఉపాధ్యాయులకు హృదయపూర్వక కృతజ్ఞతలు తెలిపారు.

ఈ సందర్భంగా సువిధ ఇంటర్నేషనల్ వ్యవస్థాపకులు భాస్కర్ వెంపటి (Bhaskar Vempati) ని టాగ్స్ చైర్మన్ నాగ్ దొండపాటి, ప్రెసిడెంట్ శ్యామ్ యేలేటి మరియు కార్యవర్గ బృందం ఘనంగా సత్కరించారు. వచ్చే ఏడాది జనవరి 2026లో జరగనున్న ‘శ్రీ శ్రీనివాస కళ్యాణం’ మరియు ‘సంక్రాంతి సంబరాలకు’ శాక్రమెంటో తెలుగు కుటుంబాలన్నీ పెద్ద సంఖ్యలో తరలిరావాలని శ్యామ్ యేలేటి ఆహ్వానించారు.

ముగింపు: రుచికరమైన అల్పాహారాన్ని ఆహుతులకు అందించిన ఫోల్సమ్ ‘రుచి రెస్టారెంట్’కు టాగ్స్ కార్యవర్గం ప్రత్యేక కృతజ్ఞతలు  అందజేసింది. టాగ్స్ వాలంటీర్లు (Volunteers) మరియు కమిటీ సభ్యుల నిర్విరామ కృషి ఈ కార్యక్రమాన్ని విజయం దిశగా నడిపించాయి అని వైస్ ప్రెసిడెంట్ శంకరి చీదెళ్ళ పేర్కొన్నారు.

టాగ్స్ గురించి మరిన్ని వివరాల కోసం ఆసక్తి ఉన్నవారందరినీ https://www.sactelugu.org/  సందర్శించాలని లేదా facebook.com/SacTelugu ద్వారా సంప్రదించాలని, లేదంటే sactags@gmail.com కు ఈమెయిల్ చేయాలని శంకరి కోరారు.