TANA @ Krishna District: శోభనాద్రి పురం గ్రామంలో 300 ఇళ్లకు శాశ్వత తాగునీటి సౌకర్యం ఏర్పాటు

గ్రామీణ ప్రాంతాల్లో తాగునీటి సమస్యను పరిష్కరించేందుకు ఉత్తర అమెరికా తెలుగు సంఘం (TANA) శోభనాద్రి పురం గ్రామంలో కొత్త బోర్‌వెల్ మరియు వాటర్ లిఫ్టింగ్ పంప్ (Water Lifting Pump) సౌకర్యాన్ని ఏర్పాటుచేసింది. రూ. 2 లక్షల విలువైన ఈ ప్రాజెక్ట్ ద్వారా సుమారు 300 ఇళ్లకు శాశ్వత తాగునీటి సౌకర్యం లభించనుంది.

గ్రామీణాభివృద్ధి పట్ల తానా అంకితభావం

తానా అధ్యక్షుడు నరేన్ కొడాలి, ఎగ్జిక్యూటివ్ వైస్ ప్రెసిడెంట్ శ్రీనివాస్ లావు, ట్రెజరర్ రాజా కసుకుర్తి (Raja Kasukurthi) నాయకత్వంలో ఈ సేవా కార్యక్రమం అమలైంది. గ్రామ ప్రజలకు శుద్ధమైన నీటి సౌకర్యం అందించాలనే లక్ష్యంతో తానా ట్రెజరర్ రాజా కసుకుర్తి వ్యక్తిగతంగా రూ. 2 లక్షలు విరాళంగా అందించారు.

ప్రజాప్రతినిధుల చేత ప్రారంభం

కొత్తగా ఏర్పాటు చేసిన బోర్‌వెల్ మరియు పంపింగ్ సిస్టమ్‌ను గన్నవరం (Gannavaram) ఎమ్మెల్యే శ్రీ యార్లగడ్డ వెంకటరావు (MLA Yarlagadda Venkata Rao) ప్రారంభించారు. గ్రామ ప్రజలు పెద్ద సంఖ్యలో హాజరై ఈ సదుపాయానికి కృతజ్ఞతలు తెలిపారు. ఇంతకు ముందు రోజూ 3 మైళ్ళ దూరం నడిచి నీళ్లు తెచ్చుకునే పరిస్థితి ఇప్పుడు తొలగిపోయింది అని వారు తెలిపారు.

గ్రామస్తుల కృతజ్ఞతలు

తాగునీటి కోసం ఎన్నో ఇబ్బందులు పడిన గ్రామస్తులు, ఈ కీలక అవసరాన్ని తీర్చినందుకు తానా (Telugu Association of North America – TANA) కు కృతజ్ఞతలు తెలిపారు. ఈ సదుపాయం గ్రామంలోని ఆరోగ్య పరిస్థితులను, శుభ్రతను, దైనందిన జీవితాన్ని గణనీయంగా మెరుగుపరుస్తుందని వారు అభిప్రాయపడ్డారు.

పేదల సంక్షేమం కోసం తానా నాయకుల హామీ

ఈ కార్యక్రమం గురించి మాట్లాడుతూ, తానా అధ్యక్షుడు నరేన్ కొడాలి (Naren Kodali), ఎగ్జిక్యూటివ్ వైస్ ప్రెసిడెంట్ శ్రీనివాస్ లావు (Srinivas Lavu), ట్రెజరర్ రాజా కసుకుర్తి గ్రామీణ పేద కుటుంబాల జీవనోపాధిని మెరుగుపరచే కార్యక్రమాలకు తానా ఎల్లప్పుడు ముందుంటుందని తెలిపారు. ఆంధ్రప్రదేశ్‌ (Andhra Pradesh) లోని వెనుకబడిన గ్రామాలకు అవసరమైన సేవలను అందించడంలో తానా ముందుంటుందని అన్నారు.